Істен шыққан робот АҚШ-тың Техас штатындағы Остин қаласының маңында орналасқан Tesla компаниясының GigaTexel зауытының инженеріне шабуыл жасады. Бұл туралы inbusiness.kz сайты Daily Mail басылымына сілтеме жасап хабарлайды.
Оқиға сонау 2021 жылы болған. Алайда ол жақында ғана белгілі болды. Мәліметтер Травис округінің федералды реттеушілеріне жіберілген өндірістік жарақаттар туралы есептің арқасында анықталды.
Робот автомобильдерге арналған жаңадан жасалған алюминий бөлшектерін бір жерден екінші жерге ауыстырумен айналысты. Кенеттен машина екі ажыратылған роботтың бағдарламалық жасақтамасымен айналысатын зауыт инженерін ұстап алды. Ол оны қабырғаға қысып, металл тырнақтарын арқасы мен қолына батырды.
Daily Mail басылымының хабарлауынша, жәбірленуші артқы жағында қатты жарақат алған және сол қолында ашық жараланған. Алайда, бұл туралы компания реттеушілерге ешқандай хабар берген жоқ. Оқиғаға еріксіз куә болған екі қызметкер шошып кетті. Сондай-ақ, олар шабуыл кезінде робот зауыттың бөлмесін қанмен ластағанын айтып өтті.
Зауыт қызметкерлерінің мүддесін қорғайтын адвокат Ханна Александр компания салықтық жеңілдіктер алу үшін есептердегі оқиғалардың санын арнайы төмендететінін айтты. Оның айтуынша, көптеген басқа жарақаттар да ресми есептерде тіркелмеген. Мысалы, қызметкерлердің бірі зауыт құрылысы кезінде жылу соққысынан опат болды.
The Information жаңалықтар порталының мәліметі бойынша, 2022 жылы GigaTexel зауытының әрбір 21-ші қызметкері жұмыс орнында жарақат алған. Ал сала бойынша жалпы орташа көрсеткіш 30-дан 1-ді құрайды.
