TikTok платформасы агенттік жасанды интеллект негізінде әзірленген Symphony Agent құралын таныстырды, деп жазады inbusiness.kz сайты.
TikTok Қазақстанда креатив әзірлеуге, жарнамалық науқандарды іске қосып, олардың тиімділігін арттыруға арналған бірқатар жаңа құралдар мен жаңартуларды ұсынды. Олар брендтерге аудиториямен берік байланыс орнатып, тұтынушымен өзара әрекеттесудің барлық кезеңінде нақты өлшенетін бизнес-нәтижелерге қол жеткізуге көмектеседі.
TikTok әзірлеген жасанды интеллект саласындағы ең жаңа шешім Symphony Agent мәдени контекст пен өзекті трендтерді терең түсінуге негізделген. Ол жарнама берушілерге TikTok платформасының ерекшеліктеріне бейімделген науқандарды жедел әрі кең ауқымда әзірлеуге мүмкіндік береді.
Symphony Agent қауіпсіздік талаптарын толық ескере отырып жасалған. Құралда ЖИ арқылы жасалған контентті таңбалау, көрінбейтін сутаңбалар және модерация сүзгілері сияқты кіріктірілген қорғаныс тетіктері бар. Ол жарнама берушінің мақсаттарын ең жоғары нәтиже көрсеткен контенттің аналитикасымен және жаңа трендтермен ұштастырып, идеяларды дайын шешімдерге айналдыруға көмектеседі.
Осы негізде құрал жекелендірілген бейнематериалдар жасап, авторлардың өзекті контентін іріктеп, науқанның барынша тиімді болуын қамтамасыз ететін ең қолайлы креаторларды ұсына алады.
Қазақстанда бұл құрал Symphony Creative Studio платформасында қолжетімді. Мұнда жарнама берушілер жасанды интеллект негізіндегі чаттың көмегімен бірнеше минуттың ішінде TikTok үшін жоғары тиімді жарнамалық роликтерді әзірлей алады.
"Креативтілік әрдайым TikTok тәжірибесінің негізі болып келді. Енді агенттік жасанды интеллект идеяларды әзірлеу мен оларды жүзеге асырудың мүлде жаңа мүмкіндіктерін ашып отыр", – деді TikTok компаниясының Таяу Шығыс, Түркия, Африка, Латын Америкасы, Орталық және Оңтүстік Азия өңірлері бойынша жаһандық бизнес-шешімдер жөніндегі бас директоры Шади Кандил.
Агенттік жасанды интеллекттің жаңа мүмкіндіктерімен қатар, TikTok Қазақстандағы компанияларға қолжетімді болған TikTok for Business платформасының бірқатар инновациялық шешімдерін де таныстырды. Бұл құралдар сату воронкасының барлық кезеңіндегі маркетингтік міндеттерді қолдауға арналған. Олар брендтерге анағұрлым креативті науқандар жасауға, брендтің танымалдығын арттыруға, аудитория қамтылуын кеңейтуге және тұтынушы жолының әр кезеңінде жарнамалық науқандардың тиімділігін жоғарылатуға көмектеседі.
Брендтерге сапалы креативті бұрынғыдан да ауқымды көлемде жасауға көмектесу үшін ByteDance компаниясының жаңа буындағы Dreamina Seedance 2.0 бейнемоделі енді TikTok Symphony платформасына біріктірілді. Ол жарнама берушілерге жасанды интеллекттің көмегімен жоғары сапалы бейнероликтерді әлдеқайда жылдам әзірлеуге мүмкіндік береді. Сонымен қатар Reference to Video сияқты жаңа функциялар брендтерге шығармашылық процесті анағұрлым нақты басқаруға жол ашады.
