Оның айтуынша, Үкіметпен бірлескен жүйелі жұмыстың арқасында былтыр 9,8% болған инфляция биыл 8,6%-ға дейін төмендеді, деп жазады inbusiness.kz сайты.
- Қазақстанның халықаралық резервтері $104,7 млрд болды. Бұл — жаһандық тұрақсыздық жағдайында ел экономикасы үшін сенімді қорған. Соның ішінде алтын-валюта резервтері 45,8 млрд долларға дейін өсіп, бір жылда 27,5%-ға артты. Ал Ұлттық қор активтері 58,8 млрд долларды құрады, - деп жазды Сүлейменов Facebook парақшасында.
Оның айтуынша, қордағы валюталық портфельдің кірістілігі 7,6%-ға жетіп, қаражат елдегі маңызды инфрақұрылымдық жобаларға бағытталды. 2024 жылдың өзінде осы мақсатқа 238 млрд теңге жұмсалған.
БЖЗҚ зейнетақы активтері де 25,9%-ға өсіп, 22,4 трлн теңгеге жетті. Инвестициялық табыс — 3,4 трлн теңге. Бұл — өткен жылмен салыстырғанда екі есе жоғары. Зейнетақы активтерінің кірістілігі 17,8% болды.
Сүлейменов цифрлық қаржы инфрақұрылымын дамыту — Ұлттық банк үшін басым бағыттардың бірі екенін атап өтті.
- Қолма-қол ақшасыз төлемдердің 90%-ы Ұлттық банктің төлем жүйелері арқылы жүзеге асады. Мемлекеттік қаражатты тиімді және ашық жұмсау үшін цифрлық теңге платформасында пилоттық жобалар қолға алынған. Сондай-ақ телефон нөмірі мен QR-код арқылы жасалатын аударымдарға арналған банкаралық жүйе іске қосылып, оған барлық банктер қосыла бастады, - деді ол.
Ұлттық банк төрағасы цифрлық қаржы активтерін құқықтық тұрғыда реттейтін заңнамалық негіз қалыптастырылып жатқанын айтты. Биыл бірқатар пилоттық жоба іске қосылмақ. Мысалы:
-
Қымбат металдардың цифрлық баламасын шығару — инвестицияға кең қолжетімділік береді;
-
Дебиторлық берешекті қауіпсіз ету (факторинг) — ШОБ-қа айналым капиталын тартуға жол ашады;
-
Теңгемен қамтамасыз етілген стейблкоин — цифрлық операциялар үшін қауіпсіз төлем құралы болуы мүмкін.
Мемлекет басшысы Ұлттық банк төрағасына мынадай міндеттер жүктеді:
-
инфляцияны төмендету;
-
резервтерді ұлғайту;
-
қаржы жүйесіне сенімді арттыру;
-
цифрлық инфрақұрылымды және қаржы активтерін құқықтық реттеу жүйесін дамыту.
Сүлейменовтің айтуынша, бұл бағыттағы жүйелі жұмыс алдағы уақытта да жалғасады.
