"Тұрғын үй құрылыс жинақ банкі" АҚ өз салымшыларына 20,1 млрд теңге өтемақының екінші жартысын мерзімінен бұрын төледі, бұл – 2015 жылдың 18 тамызына дейінгі депозит сомасының 15,8%-ы.
"Қазақстанның тұрғын үй құрылыс жинақ банкі" АҚ ақпаратына жүгінсек, өтемақыны 284221 салым иесі алған.
"Өтемақының екінші жартысын төлеуге бағытталған 20,1 млрд теңгенің 9 млрд теңгеге жуығы – банктің өз қаржысы. Осы орайда біздің соңғы 5 жылда тапқан барлық табысымызды өтемақыға жұмсағанымызды айта кету керек. Себебі біз үшін азаматтардың өз салымын сақтап қалып, армандаған баспанасына қол жеткізуі өте маңызды", – дейді "Қазақстанның тұрғын үй құрылыс жинақ банкі" АҚ басқарма төрайымы Ләззат Ибрагимова.
Тұрғын үй құрылыс жинақ банкінің салымшылары үшін өтемақы көлемі салым сомасының 35,5%-ы мөлшерінде белгіленді.
2016 жылы банк 29,3 млрд теңге өтемақының алғашқы траншын төледі. Оның 18,8 млрд теңгесі мемлекеттік бюджеттен, 10,4 млрд теңгесі банктің өз қаржысынан бөлінген болатын. 19,7%-дық алғашқы транш 316760 салымшыға төленді.
