Бұл туралы Президент Қасым-Жомарт Тоқаев айтты, деп жазады inbusiness.kz.
"Астана – болашағы зор қала. Осы орайда, біз "жасыл қала" идеясын жүзеге асыруға айрықша мән береміз. Елордамыз, ең алдымен, тұрғындарға ыңғайлы қала болуы керек. Астана – аймақтағы ірі қаржы орталығы", - деді ол Астанада өткен бауырлас қалалар форумының салтанатты ашылуында.
Мемлекет басшысы әлемнің 75 елінің 2 мыңнан аса компаниясы бизнес жүргізу үшін Астана халықаралық қаржы орталығын таңдағанын жеткізді.
"Бүгінде Қаржы орталығы елімізге 8 миллиард доллар инвестиция тартты. Бұл – жақсы көрсеткіш. Әлемдік саясатшылар Астананы бейбітшілік алаңы дейді. Ұстанымы бөлек, мүдделері кереғар елдер осында бітімге келді. Келешекте де Астана біздің геосаяси аймақтағы маңызды орталық ретінде дами бермек", - деді Тоқаев.
Айта кетейік, Мемлекет басшысы елорданы көшіру геосаяси тұрғыдан өте дұрыс қадам болғанын айтқан болатын.
