"Тергеуді уәкілетті органдар жүргізеді. Мұқият, егжей-тегжейлі. Қол жетімді барлық материалдарды Бас прокуратура жариялайды. Қоғамнан жасырар құпия жоқ. Біз барлығын ашық, жоғары кәсіби деңгейде жасаймыз. Сондықтан халықаралық сарапшыларды шақырудың қажеті жоқ деп ойлаймын. Бұл жұмыс жалғасады", – деді ол №59 референдумның сайлау учаскесінде.
Оның айтуынша, 1 600 қызметтік, коммерциялық ғимарат бүлінген, 1 мыңға жуық автокөлік өртенген, 3 мың қару ұрланған. Қаза тапқандар көп, олардың арасында "бандиттер мен террористер бар".
"Бұл мемлекет жүйесін бұзуға бағытталған террористік шабуыл екенін білеміз, сондықтан қатысқан адамдардың бәрін - қатысушы немесе арандатушы және ұйымдастырушыларды жауапкершілікке тарту қажет", – дейді Қасым-Жомарт Тоқаев.
Айтуына қарағанда, мемлекетке қарсы операцияның өзі нақты жоспарланған сипатта болды, оның жетекшілері жақсы дайындалған мамандар.
"20 мыңға келетін болсақ, бұл санды құқық қорғау органдарының бұрынғы басшылары ұсынған. Бұл бүкіл ел туралы болды. Сіз білесіз бе, бір уақытта 13 қалада қоғамдық тәртіпті бұзу мақсатында билікке қарсы бандиттік шабуылдар жасалды. Қазір 5,5 мың қылмыстық іс қозғалып, 500 қылмыстық іс сотқа жолданды. Мен тек 23 адам нақты мерзімге тартылғанына назар аударғым келеді. Бұл біздің осы қайғылы оқиғаны тергеуге өте мұқият қарайтынымызды білдіреді", – деді Президент.
Оның айтуынша, "енді қаңтар қасіреті қайталанбайды және оған бүгінгі референдум кепілдік болады".
"Біз тиісті сабақ алдық. Қаза тапқандар тізімі жарияланады. Қаза тапқандар арасында террористік тарапты, мемлекеттік жүйені бұзуды көздегендер көп. Бірақ мемлекетке қарсы ұйымдастырылған шабуылдарға қатысы жоқ адамдар да бар. Осыған байланысты біз, әрине, көңіл айтамыз және өкінеміз. Азаматтық тұрғындарға қарсы негізсіз әрекеттерге қатысқан барлық әскери қызметшілер, әрине, жауапкершілікке тартылады", – деді ол.
