Мемлекет басшысы шиеленісе түскен геосаяси қайшылықтар мен әлемдік экономикадағы тұрақсыздыққа назар аудара отырып, бірқатар тиімді шара қабылдауға шақырды.
"Бұл ретте өзара сауда-экономикалық ынтымақтастық маңызды рөл атқарады. Өздеріңізге мәлім, Қазақстанның биылғы төрағалығы аясында ТМД-ның 2030 жылға дейінгі экономикалық даму стратегиясының міндеттерін белсенді жүзеге асыру ісі жалғасты. Халықаралық нарықтағы дағдарыс жағдайына қарамастан, экономикамыз біртіндеп қалпына келе бастады", – деді ол.
Қасым-Жомарт Тоқаев кедергілерді жоюға, протекционизмге жол бермеуге, қолайлы тарифтік шарттар қалыптастыруға, әкімшілік рәсімдерді жеңілдетуге шақырды.
Бұдан бөлек Мемлекет басшысы өз сөзінде көлік-транзит әлеуетін дамыту мәселелеріне, атап айтқанда, Еуразия нарықтарына жаңа мүмкіндіктер ашатын Транскаспий халықаралық көлік бағытының келешегі бар екеніне тоқталды.
Президенттің айтуынша, Иранға, Парсы шығанағы мен Үндістанға шығатын "Солтүстік – Оңтүстік" бағыты бойынша сауда-саттықты өркендету маңызды. Сөз соңында Елордада өтіп жатқан ТМД үкіметтері басшылары кеңесінің отырысы Достастыққа мүше елдердің алдында тұрған міндеттерді шешуге ықпал ететініне сенім білдірді.
