Премьер-министрдің орынбасары Ералы Тоғжанов Токио Олимпиадасына қатысты мәдениет және спорт министрлігіне тапсырма берді, деп хабарлайды inbusiness.kz тілшісі.
Алдымен Мәдениет және спорт вице-министрі Сәкен Мұсайбеков Олимпиада ойындарына қазақстандық спортшылар дайын екенін жеткізді.
"2021 жылдағы негізгі міндет – Олимпиада ойындарына қатысу. Менің ойымша, бұл спорттық шара өтуі керек. Халықаралық Олипиада комитетінің мәліметінше, ойындар 23 шілде басталуы қажет. Ұлттық Олимпиада комитетімен байланыстамыз. Командалар дайын", - деді ол мәдениет және спорт министрлігінің кеңейтілген алқа мәжілісінде.
Осы орайда Ералы Тоғжанов басшыларға тапсырма берді.
"Биыл шілде-тамыз аралығында Токиода жазғы Олимпиада ойындары өтеді. Жапониядағы нәтиже 2016 жылдағы ойындардан төмен болмауға тиіс. Бүгінде жоспарланған 104 лицензияның 43-іне ғана қол жеткіздік. Жоспарды орындауға міндеттіміз", – деді премьер-министрдің орынбасары.
Сонымен қатар ол дүбірлі дода біткесін министрліктің жұмысына баға берілетінін ескертті.
"Олимпиаданың қорытындысы бойынша мәдениет және спорт министрлігінің жұмысына нақты баға беріледі. Ал Олимпиадаға дайындық барысын арнайы талқылаймыз", – деді Тоғжанов.
Айта кетейік, 2021 жылы Олимпиада ойындары Жапонияның Токио қаласында 23 шілдесі мен 8 тамызы аралығында өтеді.
Еске салайық, 2016 жылы жазғы Олимпиада 5-21 тамыз аралығында Рио-де-Жанейрода өтті. Жарыста 104 қазақстандық спортшы бақ сынады. Нәтижесінде Қазақстан 3 алтын, 5 күміс және 9 қола жүлдемен жалпы есепте 22-орынды иеленді.
Осыған дейін Қазақстан Олимпиада ойындарында мұнша көп медаль алмаған.
Дәурен Ерболат
