АҚШ президенттігіне үміткер Дональд Трамп сайлауда жеңіске жеткен жағдайда кәсіпкер әрі миллиардер Илон Маскқа президенттік кабинетте орын немесе кеңесші қызметін ұсынды, деп хабарлайды inbusiness.kz сайты Трамп сұхбат берген Reuters агенттігіне сілтеме жасап.
"Трамп сонымен қатар сайлауда жеңіске жеткен жағдайда Илон Маскқа кабинетте (АҚШ президенті) орын немесе "егер ол келіссе" кеңесші позициясын ұсынатынын айтты", — делінген агенттік хабарламасында. Тікелей дәйексөз келтірілмеген.
Сұхбатта Трамп сонымен қатар Вашингтондағы соттың компанияның интернет-іздеу нарығында әдейі монополист ретінде әрекет еткені және осылайша монополияға қарсы заңды бұзғаны туралы шешімі аясында Google-ді қатты сынға алды. АҚШ президенттігіне үміткер сұхбатында Google-ді "жабайы Батыспен" салыстырып, компания "жоғары құн төлеуге мәжбүр болады" деп мәлімдеді, бірақ ол Google-ді мәжбүрлі түрде бөлу керек пе, жоқ па деген пікір білдірмеді.
Маск бұған дейін Х әлеуметтік желісіндегі Spaces алаңында Трамппен сұхбат жүргізген және шілде айында президенттік жарыста Трампты қолдайтыны туралы мәлімдеме жасаған.
АҚШ президентінің сайлауы 5 қарашада өтеді. Дональд Трамп Республикалық партиядан мемлекет басшысы лауазымына ресми түрде ұсынылды. Сайлауға демократтардан қазіргі вице-президент Камала Харрис қатысуды жоспарлап отыр, ол әлі Чикагодағы конвенцияда партиядан ресми номинация ала алмады.
