АҚШ президенті Дональд Трамп қараша айында Израиль премьер-министрі Биньямин Нетаньяхумен телефон арқылы сөйлесіп, Газа секторын бейбіт реттеу жоспарын толық іске асыруды талап етті. Бұл туралы дереккөздеріне сілтеме жасаған Axios басылымы жазды, деп хабарлайды inbusiness.kz сайты Интерфакс агенттігіне сілтеме жасап.
"Бейсенбі күні әңгімелесу барысында Дональд Трамп Израиль премьер-министрінен Газа бойынша бейбіт келісімдерді іске асыру бағытында нақты қадамдар күтетінін ескертті", – делінген басылым материалында.
Ақ үй бұл мәселенің Израильдегі парламенттік сайлау қарсаңында көтерілгенін қаламаған. Енді Трамп үкіметті кім басқаратынына қарамастан, бейбітшілік жоспарының орындалуын талап етіп отыр.
Axios жазуынша, келіссөзге АҚШ мемлекеттік хатшысы Марко Рубио, сондай-ақ арнайы өкілдер Стив Уиткофф пен Джаред Кушнер де қатысқан. Нетаньяхудың өзі қоңырау шалғаны және тараптар дипломатиялық диалогтың нәтижелі өткені белгілі болды. Сонымен бірге тараптар Иранмен арадағы шиеленісті де талқылаған.
2025 жылдың қазан айында Трамп Вашингтон ұсынған бейбітшілік жоспарының алғашқы кезеңін Израиль мен ХАМАС құптағанын жариялаған болатын. Келісімнің бастапқы кезеңі бойынша кепілге алынған израильдік азаматтар палестиналық тұтқындарға айырбасталып, Израиль қорғаныс армиясы Газа аумағынан ішінара шығарылуы тиіс.
Алайда жазда Нетаньяху бұл жоспардың талаптары Израильдің аймақтағы мүдделеріне қайшы екенін баса айтты. Ол израильдік әскерді анклавтан толық алып кетпес бұрын, ең алдымен ХАМАС-ты толықтай қарусыздандыруды талап етті.
