Лиз Трасс Киев алдағы уақытта Лондонның қолдауына сене алады деп сендірді. Бұл туралы сейсенбі күні телефон арқылы сөйлесудің қорытындысы бойынша британ үкіметі басшысының кеңсесі таратқан хабарламада айтылған.
"Премьер-министр болғаннан кейін әріптесімен алғаш телефон арқылы сөйлесу кезінде Лиз Трасс Украина басшысына Лондоннан толық қолдау көрсетілетінін, Украина ұзақ мерзімді перспективада Ұлыбританияның көмегіне сене алатындығын растады", – делінген коммюникеде.
Трасс "Украинаның бостандығы мен демократиясына Біріккен Корольдіктің берік қолдауын растады". Тараптар сондай-ақ ресейлік "әскери машинаны" қаржыландыру жолдарын жабу үшін қажетті шараларды талқылады.
"Премьер-министр алдағы апталар мен айларда президентпен жұмыс істеуді асыға күтетінін айтып, Зеленскийдің Украинаға шақыруын қуана қабылдады", — деп толықтырды Даунинг-стрит.
Сейсенбіде қызметінен кеткен Премьер-Министр Борис Джонсон осы жылдың ақпан айының соңынан бастап Киевте үш рет болды – бұл басқа шетелдік көшбасшылары арасындағы ең үлкен көрсеткіш.
Динара Мұрат
