Қазақстан Республикасының Тұңғыш президенті – елбасының кітапханасы мен қоры баспа және электронды бұқаралық ақпарат құралдары қызметкерлері арасында Қазақстан Республикасының тәуелсіздік күніне арналған "Қазақстан тәуелсіздігі және елбасы" тақырыбында таңдаулы материалдарға жыл сайынғы ашық байқау жариялайды.
Байқаудың мақсаты – елдің тәуелсіздік жылдарындағы жетістіктерін көрсету, Қазақстан мемлекеттілігінің негізі ретінде "Назарбаев моделін", елбасының идеялары мен бастамаларын танымал ету.
Байқау төрт номинацияда өткізіледі: "Үздік теледидар материалы"; "Үздік радиоматериал"; "Газеттер мен журналдардағы үздік мақала"; "Ғаламтор БАҚ-тағы үздік жарияланым".
Номинациялардың әрқайсысы бойынша жеңімпаздарға 1 млн, ал екінші және үшінші орын жүлдегерлеріне – 500 мың және 200 мың теңге беріледі. Одан басқа барлық жүлдегерге дипломдар мен төсбелгілер тапсырылады.
Байқауға кәсіпқой журналистер жеке және ұжымдық негізде қатыса алады.
Конкурсқа 2017 жылдың 1 қаңтарынан 10 қазанына дейін мемлекеттік және орыс тілдерінде ресми жарияланған (басылған, эфирге шығарылған, ғаламторда орналастырылған) материалдар қабылданады.
Жеңімпаздарды салтанатты марапаттау рәсімі тәуелсіздік күні қарсаңында өткізіледі.
Байқауға қатысуға өтінімді 2017 жылдың 1 маусымынан 10 қарашасына дейін: Қазақстан Республикасы, Астана қаласы, Ә. Бөкейхан көшесі, 10, 213-кабинет мекен-жайына өткізу керек. Материал "Қазақстан тәуелсіздігі және елбасы" конкурсына" деп белгіленуі тиіс. Байланыс тел.: (7172) 69-30-57, 69-30-54, 69-30-56.
