Гүлсімай Боранбаева 10 жылдан бері Басқұдық ауылында тұрады. Соңғы жылдары жағымсыз иіс тым жиілеп кеткенін айтады. Оған бұл маңға іргелес орналасқан зауытты кінәлайды. Өйткені, түнгі мезгілде тыныштық бұзылады. Химиялық қалдықтар арнаға түсіп, бүтін ауылды улайды.
"Мына КазАзот мекемесі бізді неше жылдан бері улап жатыр. Аммиак қалдықтарын жіберіп отыр. Түрлі бөртпелер, экзема тағы бірдеңе мұрын біту көп. Енді біздің талабымыз, ҚазАзотқа мына трубасын алып тастауды талап етеміз. Мына каналдың иесіне де мына каналды жабуды талап етеміз", дейді Басқұдық ауылының тұрғыны Гүлсімай Боранбаева.
Бұл арна кезінде "Қошқар ата" көлін залалсыздандыруға қажет болған. Қаладан шыққан кәріз суы тазартылып, осы канал арқылы улы көлге құйылған. Табиғат жанышырларының сөзінше, арнадан күкірт, аммиак, нитрит сияқты адам ағзасына зиянды заттар шамадан тыс екені анықталған.
"Каналдың қазір керегі жоқ қалаға. КОС 1, КОС 2 ашылғалы қажеттілігі жоқ. Ол жер ластанып жатыр. ол жердің барлығын манағы меншік иелеріне 2 мекемеге тексеріс ашып, тазалатып сосын сот арқылы рекультивация жасауды міндеттейміз", дейді Облыстық экология департаменті басшысы орынбасарының м.а. Ержан Жұмашев.
Жылдар бойы жауыр болған мәселе көп ұзамай шешілуі мүмкін. Алайда, жұрт денсаулықтағы кінәратты кім қалпына келтіреді деп - алаңдайды.
