Түркістан қаласына қолөнерді біріктіруші – "World Craft Council" халықаралық ұйымының сарапшылары келді, деп хабарлайды inbusiness.kz сайты.
Дүниежүзілік қолөнер кеңесінің Азия-Тынық мұхиты аймағы бойынша вице-президенті Айдархан Калиев пен сарапшылары Үндістандық Сохан Кумар Джа, Түркиядан Махоотчиан Ялда, дүниежүзілік қолөнер кеңесінің Оңтүстік-Шығыс Азия аймағы бойынша вице-президенті және сарапшысы Ле Ба Нгок қала әкімімен кездесіп, қаладағы қолөнер саласының дамуымен танысты. Сонымен қатар "қолөнершілер қаласы" мәртебесіне ие болуы үшін атқарылатын жұмыс бағыттары мен саладағы ынтымақтастық жайы талқыланды.
Өткен жылы Дүниежүзілік қолөнер кеңесі ұйымының 31 мүшесі Түркістан қаласына арнайы келіп, жергілікті қолөнершілердің жұмысына жоғары баға берген болатын. Осыған орай, Түркістан қаласы аталған ұйымға мүше болуға өтінім берген.
Басқосуда дүниежүзілік қолөнер кеңесінің Азия-Тынық мұхиты аймағы бойынша вице-президенті Айдархан Калиев Түркістанмен ынтымақтастықты дамытуға дайын екенін жеткізді. Түркістанның "Халықаралық қолөнершілер қаласы" мәртебесін алу ортақ мақсат екенін жеткізіп, осы жолда бірлесіп жұмыс істеуге ниетін білдірді.
Ал, қала әкімі Әзімбек Пазылбекұлы "Халықаралық қолөнершілер қаласы" мәртебесін алудың маңызына тоқталды.
– Ұлы Жібек жолының маңызды орталықтарының бірі болып, ежелден қолөнердің дамуына үлкен үлес қосқан Түркістан бүгінде "Халықаралық қолөнершілер қаласы" мәртебесін алуға ниетті. Бүгінде қаламыздың қолөнер саласы өзінің терең тамыры мен ұлттық ерекшеліктерін сақтай отырып, заманауи үрдістермен үйлесімді дамып келеді. Түркістандық шеберлер жасаған керамикалық бұйымдар өздерінің әсемдігімен, нақышты өрнектерімен және сапасымен ерекшеленеді. Алдағы уақытта қолнершілерді қолдауға бақытталған үлкен жобаларымыз бар, – деді қала басшысы.
