Түркістан облысында биыл 6,5 мың адамды жастар практикасына жолдау жоспарланған. 1 тамызға дейін 1360 кәсіпорынға 4571 азамат (70,3%) тәжірибеден өтуге жіберіліп, оның 800-і бүгінде практикасын аяқтаған, ал 117-сі тұрақты жұмысқа орналасыпты, деп хабарлады өңірлік коммуникациялар қызметі.
Ал өткен жылы 6783 адам 1858 кәсіпорынға қабылданған. Оның 6637-сі мерзімін сәтті аяқтаса, 2274-і бағдарламаның көмегімен тұрақты жұмысқа орналасқан.
Жастар практикасы жобасы түлектердің алған кәсібі (мамандығы) бойынша бастапқы жұмыс тәжірибесін жинақтауы үшін арнайы қолға алынған. Жастар практикасына 29 жастан аспаған жұмыссыздар оқуды аяқтағаннан кейін 3 жыл ішінде жіберіледі.
ЖОО түлектері тәжірибеден 6 ай бойы өтеді, ай сайын еңбекақысы төленеді.
Жастар практикасына қатысу үшін халықты жұмыспен қамту орталықтарына жұмыссыз ретінде тіркелу керек.
