Түркістан облыстық прокуратурасының мәліметінше, кезекті рейд кезінде 11 қараша күні Кентау қаласы, Қарнақ ауылына қарасты жайылымда “Көкпар” ойыны өтіп жатқаны анықталған. Ұлттық ойын додасына 200-ге жуық адам жиналыпты. Мобильді топ өкілдері көкпарға жиналғандарды дер кезінде тарқатып, түсіндірме жұмыстарын жүргізген.
"Адамдардың көптеп шоғырлануына жол берген көкпар тойының иесі мен ұйымдастырушысына Әкімшілік құқық бұзушылық кодексінің 425-бабы, яғни Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу бойынша әкімшілік хаттама толтырылды. Жинақталған ақпараттар шешім қабылдау үшін тиісті органға жолданып, айыппұл салынды" – деді облыстық прокуратурадағылар.
СЭС мамандарының айтуынша, өңірде карантин кезінде санитарлық талаптарды елемейтіндер қатары азаймай тұр. Осыдан 5 күн, яғни 8 қараша күні де дәл осы Кентау қаласына қарасты Қарнақ ауылында көкпар өткізілгені анықталған болатын. Додаға 500-ге жуық адам жиналған. Құзырлылар бұл оқиғаны ғаламтор желісінен бір-ақ білген.
Ол кезде де аталған заң бұзушылықтарды жою мақсатында облыс прокуратурасымен санитарлық-эпидемиологиялық бақылау басқармасына ұсыну енгізіліп, көкпарды ұйымдастырушы щдәкімшілік жауапкершілікке тартылған.
Жансая Тәуекелқызы
