Өңір басшысы өз сөзінде Түркістан облысының әлеуметтік-экономикалық әлеуетінің артып, Түркістанның жаңа келбеті, жаңа болмысы қалыптасып келе жатқанына тоқталды, деп хабарлайды әкімнің баспасөз қызметі.
"Тарихи өлшеммен қарасақ бұл өте қысқа уақыт, алайда атқарылған қыруар жұмыс нәтижесінде Түркістанның жаңа келбеті, жаңа болмысы қалыптасып келеді", – деді Өмірзақ Естайұлы.
Ең басты мақсат – Түркістанды замануи қала ету, өмір сүруге ыңғайлы, жайлы ету. Осы бағытта шаһар арқылы "Батыс Қытай –Батыс Еуропа" автожолы, темір жол өтеді, жыл соңына дейін іске қосылатын Халықаралық аэропорт – қаланың өсу потенциалын тағы да арттыратыны сөзсіз.
Бүгінде Түркістан қаласында алғашқы кезекте 175 нысанның құрылысы жоспарланса, соның 102-сі жыл аяғына қарай пайдалануға берілетін болады. Түркістанның туристтік, білім орталығы ретінде дамыту үшін арнайы Туризм және меймандостық универститеті ашылды, рухани-мәдени орталық ретінде дамыту үшін 2019 жылы 9 әлеуметтік нысан тапсырылса, биыл 20 нысан құрылысы аяқталып, ел игілігіне берілмек.
Жаңадан қалыптасқан облыста жұмыс істеуге бүкіл республикадан мамандар келіп жатыр, оларды баспанамен қамту маңызды мәселенің бірі. 2019 жылы қалада 1128 отбасы жаңа пәтер иеленсе, бүгінгі күнге түрлі қаржыландыру көздері арқылы 6300 пәтерді құрайтын 136 көпқабатты үй құрылысы жалғасуда.
Соңғы 2 жылда Түркістан облысының экономикасына түрлі қаржы көздері бағытталды. Бір ғана Түркістан қаласына салынған инвестиция көлемі 160 млрд теңгеден артты.
Өмірзақ Естайұлы облыста соңғы жылдары бірқатар қиындық орын алғанын да атап кетті. Арыстағы жарылыс, Төлеби мен Мақтаарал ауданындағы су тасқыны зардаптарын жою жұмыстары да жүйелі түрде жүзеге асуда. Бұл қиындықтарды бірге еңсеріп келе жатқан облыс жұртшылығына алғысын білдірген өңір басшысы түркістандықтарды жаңа тарихтың жазылуына үлес қосуға шақырды.
