Бүгін Түркістан облысында облыстық денсаулық сақтау басқармасының және БҰҰ-ның Балалар қорының (ЮНИСЕФ) ұйымдастыруымен медициналық қызметкерлердің біліктілігін арттыруға бағытталған оқу орталығы ашылды, деп хабарлайды өңір әкімінің баспасөз қызметі.
Салтанатты рәсімге ЮНИСЕФ-тің Қазақстандағы өкілі Юрий Оксамитный, Түркістан облысы денсаулық сақтау басқармасының басшысы Мұқан Егізбаев және облыстың медициналық қоғамдастық өкілдері қатысты.
Аталған орталық әмбебап-озық үлгідегі кешенді қызмет көрсете алатын патронажды медбикелерді дайындап шығаратын болады. Орталық жыл сайын мыңдаған патронажды медбикелерге, дәрігерлерге, әлеуметтік қызметкерлерге, сондай-ақ психологтарға балалардың толыққанды дамуы жайлы ата-аналарды ақпараттандыруға қажетті біліммен қамтамасыз етпек.
Айта кетерлігі, орталық кіші жастағы балалардың толық дамуы саласындағы ЮНИСЕФ пен ДДСҰ-ның халықаралық стандарттарына сәйкес келетін озық білімі бар дәрігерлерді, патронажды медбикелер мен әлеуметтік қызметкерлерді оқытып шығаруға қажетті құралдармен толықтай жабдықталған.
Сондай-ақ, орталықтың ашылуына орай Түркістан облысы әкімдігі мен ЮНИСЕФ-тің қазақстандағы өкілі арасында меморандум түзілді. Халықаралық ұйым өкілі Юрий Оксамитныймен кездескен облыс әкімі Өмірзақ Шөкеев жаңа орталықтың ашылуымен құттықтады.
