Түркістандық полицейлер тұрғынды тонап, ақшасы мен телефондарын тартып алған күдіктілерді ұстады, деп хабарлайды inbusiness.kz Polisia.kz-ке сілтеме жасап.
Келес аудандық ПБ-не брокер болып жұмыс істейтін жергілікті тұрғын арызданған. Ер адам өзін түнде белгісіз біреулер ұрып-соғып, ішінде 360 мың теңге, 2000 АҚШ доллары және 57000 рубль, сондай-ақ Iphone екі телефоны болған барсеткасын тонап кеткенін хабарлады.
Шығын - 2,7 млн теңге.
ҚР ҚК-нің 191-бабы 2-бөлігі "Тонау" бойынша тіркелді.
"Жедел-іздестіру іс-шараларының нәтижесінде, 6 күдікті ұсталды. Олар Келес ауданы мен Шымкент қаласының тұрғындары болып шықты. Күдіктілерден заттай дәлел ретінде екі ұялы телефон мен ұрланған ақшаның бір бөлігі тәркіленді", - делінген хабарламада.
Сонымен қатар күдіктілердің екеуі Келес ауданындағы кеден бекеті аймағында жұмыс істейтіні, олар жүк көліктерінің жүргізушілері мен брокерлерді бопсалаумен айналысқаны анықталды.
Қазір сотқа дейінгі тергеу амалдары жүргізілуде. Күдіктілер ПБ-ге жеткізілді. Олардың басқа да қылмыстарға қатысы мен оқиғаның мән - жайы анықталып жатыр.
