Жеті күнге жоспарланған фестиваль барысында Түркістан мен Сауранның тарихы жайлы мол мағлұмат беруге арналған көптеген шара өткізіледі, деп хабарлайды otyrar.kz.
"Оңтүстік аңыздары" жобасы аясында қолға алынған экспедициялық фестивальдің гала-концертін тамашалауға 5 мың көрермен шақырылады.
Ұйымдастырушылардың айтуынша сахна Сауран қалашығы бейнесінде жасалынады. Экспедициялық концерттің тартуы ретінде тарихи қалашық маңына жүргінші жолы мен мыңдаған көшет отырғызылмақ. Концерт алаңының құрылысын жүргізуші – BI Group құрылыс компаниясы.
Қазақстандық және шетелдік әншілердің қатысуымен өтетін шараның мақсаты — ХІІІ-ХVІІІ ғасырларға тән Сауран қалашығын насихаттай отырып, туристерді көптеп тартуға ықпал ету.
Ортағасырлық Сауран қаласы Түркістан қаласынан солтүстік-батысқа қарай 46 шақырым жерде орналасқан.
Қазіргі таңда Сауран қаласы солтүстіктен оңтүстікке қарай 850метр, шығыстан батысқа қарай 660метр созылып жатқан қорған қамалмен қоршалған.
Гала-концерт 25-26 сәуірге жоспарланған.
