Түркістан облысы ПД Ұйымдасқан қылмысқа қарсы күрес басқармасының қызметкерлері ірі көлемде заңсыз оқ-дәрілер сату, сақтау қылмысының жолын кесті, деп хабарлайды inbusiness.kz Polisia.kz сайтына сілтеме жасап.
Тәртіп сақшылары жедел-іздестіру іс-шаралары кезінде облыс орталығында заңсыз оқ-дәрі сататын дүкенді анықтады. Жедел уәкілдер сауда дүкеніне қатысты тиісті ақпараттар жинақтап, тінту жұмыстарын жүргізді. Нәтижесінде күдікті ретінде оқ-дәрілерді сатып, сақтаумен айналысатын бір ер адам, бір әйел анықталған. Ал, олар жұмыс істеген дүкеннен 2 мыңға жуық оқ-дәрі тәркіленді. Оның ішінде, 990 данасы 16 калибрлі аңшылық мылтыққа арналған болса, 15 келі бытыра және бір дыбыс тұншықтырғыш, сонымен қатар дүкен қоймасынан 12 қорапта жалпы 925 оқ алынды. Сондай-ақ, сатушы әйелдің үйінен 9 мм VALTRO-COMBAT газдық тапанша тәркіленді.
Аталған оқиға ҚР ҚК-нің 287-бабы 4-бөлігі (Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) бойынша тіркелді. Баллистикалық сараптама тағайындалды. Қазіргі уақытта сотқа дейінгі тергеу амалдары жүргізіліп жатыр.
