Облыстағы 230 мың тұрғын кедейлердің қатарында, деп хабарлады inbusiness.kz тілшісі.
Статистикаға сүйенсек, Түркістан облысы халық ең тығыз қоныстанған аймаққа жатады. Өткен жылдың IV тоқсанының соңында облыста 2 млн-нан астам адам тұратыны анықталды. Бұл қазақстандықтардың жалпы санының 10,8%-ы.
Облыс басшысы Өмірзақ Шөкеев өткен айда былтыр тұрғындардың әлеуметтік жағдайы мен өмір сапасын жақсартуға және өңірдің әлеуметтік-экономикалық дамуына серпін беру бағытында атқарылған шараларды тілге тиек еткенде 2020 жылдың 9 айының қорытындысында Түркістан облысында жан басына шаққандағы жалпы өңірлік өнім 729,2 мың теңгені құрағанын жариялады. Бұл еліміздегі барлық өңірлер арасындағы ең төменгі мән.
Нақтылайтын болсақ, еліміздегі орташа көрсеткіштен 70,2% -ға төмен.
Облыста табысы ең төменгі күнкөріс деңгейінен төмен халықтың үлесі еліміздегі 5,7% көлеміндегі орташа көрсеткіштен 2 есе жоғары.
Түркістандықтар жұмыссыздық көрсеткіші бойынша да қиын жағдайды бастан кешіріп отыр. Мұндағы теріс нәтиже – 5,3%.
Қанат Махамбет
