Ыстамбұлдағы Karga Seven Pictures кинокомпаниясының кеңсесінде шартты атауы "Алтын империя" жобасы бойынша шығармашылық топтың отырысы өтті, деп хабарлайды inbusiness.kz сайты ҚазАқпарат агенттігіне сілтеме жасап.
Ақпаратқа сәйкес, кездесуге Қазақстанның Мемлекеттік кеңесшісі Ерлан Қарин, Karga Seven Pictures компаниясының тең құрылтайшылары Эмре Сахин мен Фикрет Маноглу қатысып, сериалдың 6 эпизодының сценарийлері мен басты рөлдерге актерлік құрамын бекітті.
Осыған дейін елімізде сериал түсірілімінің тек 40%-ы өтеді деп жоспарланған болатын. Алайда сериалдың бас продюсері және режиссері Эмре Сахин локацияларды жан-жақты зерттеген соң, түсірілімді толығымен Қазақстанға көшіруді ұйғарған. Түсірілім жұмыстары 2025 жылдың ақпанында басталады.
