Түркия конституциясына президенттің өкілеттігін айтарлықтай кеңейтетін өзгерістер енгізу мәселесі жөніндегі референдум 16 сәуірде өтеді, деп хабарлады бейсенбі күні Түркияның әділет министрі Бекир Боздаг.
"Референдум өтетін күн 16 сәуірге жоспарланған", – деп мәлімдеді ол TRT телеарнасының эфирінен.
Дегенмен, түрік ақпарат құралдары референдум өтетін күнді ресми түрде Түркия президенті Режеп Тайып Ердоған мәлімдейді деген ақпарат таратып отыр.
Конституцияға бірқатар өзгерістер пакетін парламентке билеуші Әділдік және даму партиясы ұсынды. Түзетулер президентке вице-президенттер, министрлер мен жоғары лауазымды шенеуніктерді тағайындау, министрліктерді құру, тарату, құзіреттері мен құрылымдары бойынша шешім қабылдау жөнінде құқық береді. Сонымен қатар премьер лауазымы жойылады.
