Жаңа заңнама аясында тұрмыстық жанжалдар туралы 50 мыңнан астам өтініш қаралып, 64%-ы бойынша әкімшілік іс қозғалды. Бұл туралы ІІМ Әкімшілік полиция комитетінің төрағасы Қайсар Сұлтанбаев айтты, деп хабарлайды inbusiness.kz сайты.
"Әкімшілік қамауға тартылған адамдардың саны 2 есеге (6 мыңнан 13 мыңға дейін) артты. Осылайша кез келген құқық бұзушылыққа төзбеушілік атмосферасын құра отырып, қоғамды аса ауыр қылмыстардан сақтаймыз", - деді спикер.
Қайсар Сұлтанбаевтың сөзінше, 2023 жылы қоғамдық орындарда жасалған қылмыстардың саны 12%-ға азайған.
"Көшелерде жасалған қылмыстардың түрлері бойынша төмендеу байқалып отыр. Атап айтқанда, кісі өлтіру 33%-ға, бұзақылық – 29%, қарақшылық –14%, тонау – 13%, ұрлық 11%-ға азайған. Бұл жұмыс жалғасады және күшейтіледі", - деді ведомство өкілі.
Айта кету керек, осыған дейін өткен жылы 127 көлік жүргізушісі полицейлерге пара ұсынғанын жазған болатынбыз.
