Америкалық Twitter компаниясының түсімі өткен тоқсанда $1,2 млрд-тан асты, деп хабарлайды inbusiness.kz компанияның мәлімдемесіне сілтеме жасап.
Бұған дейін сарапшылар бұл қаржылық көрсеткіш кемінде $1,23 млрд болады деп топшылаған болатын.
2022 жылдың алғашқы үш айында көрсеткіш өткен жылдың дәл осы кезеңімен салыстырғанда 16%-ға өсті. Компанияның осы кезеңдегі тапқан пайдасының көлемі – $513,2 млн.
25 сәуірде Twitter басшылығы америкалық кәсіпкер Илон Маск компанияны $44 млрд долларға сатып алатынын хабарлады.
АҚШ-тың бағалы қағаздар және биржалар жөніндегі комиссиясының мәліметі бойынша, егер миллиардер келісімнен бас тартатын болса, ол Twitter-ге 1 миллиард доллар көлемінде айыппұл төлеуі тиіс. Келісімнің жабылуы 2022 жылдың 24 қазанына белгіленді.
Табиғат Нұрболат
