Тыйым салынған заттарды алып өтпек болған 85 талапкер тест тапсыру мүмкіндігінен айрылды. Тағы 109 адам тестілеу кезінде ережелерді бұзғаны үшін аудиториядан шығарылып, олардың нәтижелері жойылды, деп жазады inbusiness.kz.
Талапкерлердің 78%-ы немесе 86 мың абитуриент шекті балл жинады. 22 пайызы шекті межені еңсере алмады. Орташа көрсеткіш – 70 балл. Бұл былтырғыға қарағанда бір балға жоғары. Ең жоғары балл – 136.
“Наурыз айындағы ҰБТ аяқталды. Ол 10 наурыздан бастап 31 наурызға дейін жүргізілді. Республика бойынша 111 мыңға жуық талапкер ҰБТ тапсырды. Тестілеуге қатысқандардың басым бөлігі, яғни 19%-ы "математика-физика", 19%-ы "биология-химия" комбинацияларын таңдаған. IT бағыттарға түсуге қажетті жаңа "математика-информатика" комбинациясын ҰБТ-ға қатысушылардың 11%-ы тапсырған. Тестілеу штаттық режимде өтті”, - деді Оқу-ағарту министрлігі Ұлттық тестілеу орталығының директоры Руслан Емелбаев.
ҰБТ-ға ерекше білім беру қажеттілігі бар 237 бала қатысқан.
Ақпаратқа сәйкес, наурыз айындағы ҰБТ нәтижесімен университеттердің ақылы бөліміне ғана оқуға түсуге болады.
