Бүгінге дейін мемлекеттік бағдарламалар аясында 743 мың адам жұмысқа орналастырылды. Жоспар бойынша 1 млн 220 мың адам жұмыспен қамтылуы керек.
Еңбек және халықты әлеуметтік қорғау министрі Біржан Нұрымбетов үкімет отырысында мәлімдегендей, "Еңбек" бағдарламасына 379 мың адам қатысуға ниет білдірді. Оларға кәсіпкерлікпен айналысуға 5 800 жеңілдетілген несие, 17 200 қайтарымсыз грант берілді".
Министрдің мәлімдеуінше, 34,5 мың адам кәсіпкерлік негіздері бойынша
қысқа мерзімді курстарға қатысып жатыр. Қыркүйек айында ҰБТ-дан өтпей қалған мектеп түлектері жұмысшы мамандықтар бойынша тегін кәсіптік-техникалық оқуға жіберіледі.
"Жұмыспен қамту орталықтары арқылы 130 мың адам жұмыс тапты.
"Еңбек" бағдарламасының өңірлер бөлінісінде орындалуына тоқталатын болсақ, 14 тамыздағы жағдай бойынша 5 800 шағын несие алған адам қосымша 6151 тұрақты жұмыс орнын ашты. 17 200 гранттың 51% аз қамтылған, көпбалалы отбасыларға және жұмыссыздарға тағайындалды", – деді Біржан Нұрымбетов.
Қанат Махамбет
