2018 жылы мемлекет шығыстарына 9 трлн 218 млрд теңге жұмсалуы тиіс. Бұл 2017 жылмен салыстырғанда 134,6 млрд теңгеге жоғары.
Бүгін үкіметтің селекторлық отырысында 2018-2020 жылдарға арналған бюджет мақұлданды. Қаржы министрі Бақыт Сұлтановтың айтуынша, жобаның базалық сипаттамасы жаңа бюджет саясаты мен 2022 жылға дейінгі әлеуметтік-экономикалық даму болжамына қарай айқындалған. Сонымен, алдағы 3 жылда мемлекеттік инвестиция көлемі - 1,4 трлн теңгені құрамақ. 512,6 млрд теңге - "Нұрлы жер" бағдарламасына жұмсалса, оның 208,8 млрд-ды тұрғын үй құрылыс сегментіне салынады. 195 млрд – агроөндіріске, 232,9 млрд - индустриалды-инновациялық дамуға, 292,6 млрд - транспорт жүйесіне, ал 3 трлн 473 млрд теңге қорғаныс пен ішкі қауіпсіздікті бекітуге беріліп отыр. Бюджет тапшылығы 2018 жылы – 1-ден 1,1%-ды құрайды деп те болжалған.
Бақыт Сұлтанов, ҚР қаржы министрі: "Мұнайдан тыс түсімдердің көлемі ағымдағы жылдың жоспарына қарағанда 851,1 млрд теңгеге немесе 19,3 пайызға өсіп, 2018 жылы 5 трлн 271,4 млрд теңгені құрайды".
Бюджетке түсетін мұнай түсімдерінің көлемі 2017 жылмен салыстырғанда 1 трнл 901,3 млрд теңгеге төмендейді. Бұл Ұлттық қордан берілетін кепілдірілген трансфертті біртіндеп азайтуға және нысаналы трансферттен бас тартуға байланысты болды.
Бюджет мұнай бағасын барреліне 55-ден 45 доллар, ал валюта бағамы 1 доллар 340 теңге шамасында деген болжаммен бекітіліп отыр. Ал Ұлттық экономика министрі Тимур Сүлейменов алдағы 5 жылда Жалпы ішкі өнім 4,2% өседі дегенді де келтіреді. Мұнай өндіру көлемі 2018 жылы 86 млн тонна, 2022 жылы 88,6 млн тоннаға артауы тиіс екен.
Тимур Сүлейменов, ҚР ұлттық экономика министрі:
"Ішкі және сыртқы параметрлердің өзгеруіне қарай Қазақстан экономикасын дамытудың ықтимал 3 сценарийін қарастырып отырмыз. Оптимистік сценарий бойынша 2018-2022 жылдары мұнай бағасы барреліне 55 доллар болады. Пессимистік сценарийға қарағанда, мұнай бағасы 35 долларға дейін төмендейді. Бірақ орта есеппен үшінші сценарийді алып отырмыз. Онда 2018-2022 жылдарға арналған бюджет мұнай бағасын барреліне 45 доллар шамасында базалық ұстаныммен бекітіледі".
