Сәуірде, ҚР Үкіметі мен Ұлттық Банкі бірлесіп 2022 жылғы айлық есептік көрсеткішті нақтылау туралы шешім қабылдағаны белгілі. Бүгін бұл шешім туралы түсініктеме берді, деп хабарлайды inbusiness.kz.
Үкіметтің түсіндіруінше 2022 жылға инфляция дәлізі 4-6%-дан 8-10%-ға дейін ұлғайды, яғни инфляция өсімі 4%-ды құрады. Осыған байланысты, "2022-2024 жылдарға арналған республикалық бюджет туралы" Қазақстан Республикасының Заңына өзгерістер мен толықтырулар енгізу туралы" 2022 жылғы 12 мамырдағы Қазақстан Республикасының Заңына сәйкес 2022 жылғы 1 сәуірден бастап айлық есептік көрсеткіш 3 063 теңгеден 3 180 теңгеге дейін және ең төменгі күнкөріс деңгейі 36 018 теңгеден 37 389 теңгеге дейін өсті.
"Осыны ескере отырып, 2022 жылғы 1 сәуірден бастап зейнетақы төлемдері мен жәрдемақылардың мөлшері қосымша 4%-ға арттырылды", делінген хабарламада.
Жалпы алғанда 2022 жылы зейнетақы төлемдерінің өсуі алдыңғы жылға қарағанда 11%-ды (инфляция деңгейінен 2%-ға оза отырып), базалық зейнетақы төлемі мен жәрдемақылардың өсуі 9%-ды құрады.
Айыппұл санкциялары, салықтар және ҚР заңнамасына сәйкес басқа да төлемдер үшін 2022 жылғы 1 қаңтардан бастап белгіленген 3 063 теңге мөлшеріндегі АЕК қала береді.
