Украина аумағынан 450-ден астам қазақстандық эвакуацияланды, 2 наурыз тағы 80-ге жуық ел азаматы шекарадан өтеді. Бұл туралы Парламент отырысында ҚР Сыртқы істер министрінің бірінші орынбасары Шахрат Нұрышев мәлім етті, деп жазды inbusiness.kz
"Осы күндері Украина аумағынан шекара арқылы 450-ден астам адам эвакуацияланды. Қазір Киевте бір топ, Львовта бір топ қазақстандық жиналуда, бүгін тағы 70-80 адам шекарадан өтеді деп күтілуде", – деді Нұрышев Парламент отырысында.
Сонымен қатар ол жолда қалып қойған жүк тасымалдаушыларға қатысты әлі біраз мәселе бар екенін атап өтті.
"Бізде 55 көлік туралы толық ақпарат бар, оның 19-ын Ресей жағымен, поляк тарапымен, Беларусь тарапымен келісіп қойған. Олар шекарадан өтуі үшін Молдовамен де мәселе шешілді. Қалғандары қазір нақты қайда екенін және нақты қандай мемлекеттердің шекарасынан өтуге болатынын анықтап жатырмыз", – деді Сыртқы істер министрінің орынбасары.
Сонымен қатар спикер Қазақстанның Украинадағы елшілігінде 1,6 мыңға жуық қазақстандықтың тіркелгенін еске салды.
"660 адамды эвакуациялау бойынша өтініштер түсті", – деді спикер.
Оның айтуынша, Қазақстанның Киевтегі елшілігінде елшімен қоса 8 қызметкер қалды.
"Олардың барлығы Киевте, соғыс қимылдары, атыс, бомбалау болып жатқанына қарамастан, біздің азаматтарды эвакуациялаумен айналысуда", – деді Нұрышев.
Құралай Құдайберген
