Украина қару-жарақ және дәрі-дәрмек сатып алу үшін қаржылай көмек ретінде Австралиядан $3 млн алады. Бұл туралы ел Премьер-Министрі Скотт Моррисон мәлім етті, деп хабарлайды inbusiness.kz.
"Шұғыл шара ретінде Австралия НАТО арқылы Украинаға қару-жарақ пен дәрі-дәрмектерді сатып алу және жеткізу, сондай-ақ осы елге қаржылай көмек көрсету үшін шамамен 3 миллион доллар жібереді. Украинаға әскери техникалар мен қару-жарақтарды беру тәртібі НАТО-дағы серіктестермен және одақтастармен талқыланып, Америка Құрама Штаттары мен Ұлыбританиядағы әріптестермен арадағы келіссөздер аяқталғаннан кейін айтылады", – деді премьер-министр.
Моррисон географиялық қашықтыққа және басқа жағдайларға байланысты Австралия Украинаға АҚШ пен Ұлыбритания сияқты айтарлықтай көмек көрсете алмайтындығын айтты. Бұған дейін Австралия премьер-министрі Украинаға гуманитарлық көмек көрсетіліп, туристік және отбасылық визаларды беру рәсімін жеделдету уәде еткен болатын.
Табиғат Нұрболат
Фото: Shutterstock.com
