Украинада 18 бен 22 жас аралығындағы ер азаматтар үшін мемлекеттік шекараны кесіп өту туралы жаңа ережелер пайда болды, деп хабарлайды inbusiness.kz сайты DW агенттігіне сілтеме жасап.
Жаңашылдық туралы Украинаның премьер-министрі Юлия Свириденко мәлім етті.
"18-22 жас аралығындағы ер азаматтар соғыс болып жатқанына қарамастан, шекараны еш кедергісіз кесіп өте алады. Бұл осы жастағы барлық азаматқа қатысты. Тиісті өзгерістер түрлі себеппен шетелде жүрген азаматтарды да қамтиды", – деді ол.
Ел үкіметінің басшысы жаңа ережелер украиндықтардың туған жерімен байланысын сақтау мақсатында енгіліп отырғанын алға тартты.
Ресей Украинаға басып кіргеннен бері елде соғыс жағдайы енгізілген. Осыған байланысты 18 бен 60 жас аралығындағы ерлерге елден шығуға тыйым салынған болатын.
