БҰҰ Адам құқықтары жөніндегі Жоғарғы комиссарының басқармасы (БҰҰ АҚЖЖКБ) Ресейдің әскери агрессиясының салдарынан Украинада қаза тапқан және зардап шеккен бейбіт тұрғындардың саны туралы өзекті деректерді жариялады, деп жазады inbusiness.kz сайты.
6 қыркүйекте ұсынылған есепке сәйкес, 2022 жылдың 24 ақпанынан 2024 жылдың тамыз айының соңына дейін бейбіт украин халқы арасында жараланғандар саны кемінде – 24 614 адам, ал қаза тапқандар саны 11 743 болды.
"2024 жылдың тамызында Украинада кем дегенде 184 бейбіт тұрғын қаза тауып, 856 адам жарақат алды – бұл 2024 жылы құрбан болғандар саны бойынша көш бастаған шілдеден кейінгі екінші рекордтық көрсеткіш", - дейді ай сайынғы есеп авторлары.
Олардың айтуынша, шілдеде кем дегенде 219 азамат қаза тауып, тағы 1018 адам жараланған.
БҰҰ АҚЖЖКБ-да бейбіт тұрғындар арасында зардап шеккендердің көп болуы жаппай шабуылдармен, атап айтқанда Донецк облысындағы Константиновка мен Харьков, сондай-ақ майдан шебіне жақын, әсіресе Донецк облысында күнделікті шабуылдармен байланысты.
