Республикалық маңызы бар Алматы – Космостанция трассасының 8-34 шақырымы аралығы учаскесі ("Алма-Арасан" шипажайына кіреберіс) күрделі жөндеуден өтеді, деп хабарлайды inbusiness.kz "ҚазАвтоЖол" баспасөз қызметіне сілтеме жасап.
Бүгінде жобалау-сметалық құжаттама дайын, экологиялық сараптама сатысында тұр. Сараптаманың оң қорытындысын алғаннан кейін конкурс жарияланып, заңнамаға сәйкес мердігер анықталады. Содан кейін учаскеде құрылыс-монтаж жұмыстары жүргізіледі.
Айта кету керек, жол екі жолақты болып қала бермек. Сонымен қатар жобада 1-ге 10 өтемдік ағаш отырғызу қарастырылған.
Күрделі жөндеу жұмыстары аясында аумақта бақылау алаңдары, автокөліктерге арналған тұрақтар және тас құламасынан қорғайтын торлар салынбақ.
Естеріңізге сала кетейік, Алматы – Космостанция республикалық маңызы бар жол III санатқа жатады, жабыны – асфальт-бетон. Оның ұзындығы 26 шақырым.
