Қазақстан Ұлттық Банкі "Сиқырлы нышандар" сериясынан AI•KÚN және "Көшпенділердің ғибадат жануарлары – тотемдері" сериясынан TÚIE коллекциялық монеталарын айналымға шығаратынын мәлімдеді, деп хабарлайды Inbusiness.kz сайты.
Монеталардың сатылымға шығатын күніне қатысты қосымша ақпарат ҚҰБ ресми сайтында жарияланады.
AI•KÚN коллекциялық монетасының дизайны қарама-қайшылықтар бірлігі түсінігіне негізделген. Күн батылдық пен белсенділікті білдірсе, ай тыныштық пен шығармашылықтың символы болып табылады. Монета жоғары бедерлі, алтын жалатылған және екі жақты тотығу технологиясы қолданылған, күміс сынамасы – 925/1000, массасы – 31,1 грамм, диаметрі – 38,61 мм, сапасы – antique silver, номиналы – 500 теңге, таралымы – 3 000 дана.
TÚIE – "Көшпенділердің ғибадат жануарлары – тотемдері" сериясымен шығып жатқан алтыншы монета. Оның дизайнында сақ стилінде бейнеленген жануардың натуралистік және трафареттік көрінісі біріктірілген.
Көшпенділер мәдениетінде түйе адамгершілік пен тәуелсіздік, күш-жігер мен төзімділіктің бейнесі саналады.
