Сенаттың жалпы отырысында Ұлттық экономика министрі Әсет Ерғалиев осындай болжам жасалғанын жариялады, деп хабарлайды inbusiness.kz.
"Кепілдендірілген трансфертті 2022 жылы – 2,4 трлн, 2023 жылы – 2,2 трлн, 2024 жылы 2 трлн теңге мөлшерінде айқындау ұсынылды", – деді министр.
Әсет Ерғалиевтің айтуынша, Ұлттық қордан алынатын кепілдендірілген трансферт республикалық бюджеттен төленетін ортақ және мемлекеттік базалық зейнетақы төлеміне жұмсалады.
Ұлттық қордан 2022 жылға – 550 млрд теңге, 2023-2024 жылдарға 400 млрд теңгеден қосымша нысаналы трансферт тартылады екен. Бұл туралы министр: "Қаражатты "Nur Otan" партиясының сайлауалды бағдарламасының іс-шараларын қаржыландыруға бағыттау ұсынылды", – деді.
Әсет Ерғалиевтің сөзінше, мұнай бағасы барреліне 60 доллар болған жағдайда мұнай секторынан Ұлттық қорға болжам бойынша 2022 жылы – 2,5 трлн теңге түседі.
"Бұл көрсеткіш 2024 жылы 3 трлн теңгеге дейін ұлғаяды. Осы аралықта Ұлттық қордың валюталық активі 55,3 млрд доллардан 61,6 млрд долларға дейін артады деп болжануда", – деді Әсет Ерғалиев.
Қанат Махамбет
