Босқындар елде 20 жыл өмір сүргеннен кейін ғана тұруға рұқсат сұрай алады, деп жексенбі, 16 қарашада жарияланған The Sunday Times басылымына берген сұхбатында Ұлыбританияның ішкі істер министрі Шабана Махмуд мәлімдеді, деп хабарлайды inbusiness.kz сайты DW басылымына сілтеме жасап.
Жаңа заң қабылданғаннан кейін ережелер Ұлыбританияға заңсыз жолмен – мысалы, қайықтармен немесе жүк көліктерімен келген, кейін баспана сұраған мигранттарға, сондай-ақ визасының мерзімі өткеннен кейін баспана үшін өтініш білдіретіндерге қолданылатын болады.
Шабана Махмуд босқындарға материалдық көмек көрсету жөніндегі мемлекеттің заңды міндетін алып тастауды көздеп отыр. Өзін-өзі қамтамасыз етуге қабілетті, бірақ оны жасамайтын адамдар әлеуметтік тұрғын үй мен жәрдемақылардан айырылады.
Босқын мәртебесі әр 30 ай сайын қайта қаралып отырады, ал қауіпсіз деп танылған елдерден келгендер өз отанына қайтарылады, деп атап өтті Махмуд. Оның айтуынша, "баспана алғандардың көпшілігі ақыры Ұлыбританияда өмір бойы қалып қояды".
Қолданыстағы 2005 жылы лейбористер қабылдаған заңдарға сәйкес, босқындар елде бес жыл тұрғаннан кейін тұрақты тұруға рұқсат алуға құқылы. Бұл құжат оларды әлеуметтік төлемдер мен жеңілдіктер алуға құқылы етеді және азаматтық алуға жол ашады.
Ішкі істер министрі егер Ұлыбритания үкіметі барған сайын күрделене түскен заңсыз көші-қон проблемасымен айналыспаса, ел қауіп-қатерге тап болатынын ескертті.
"Мен – және әріптестерім де көріп отыр – заңсыз көші-қон біздің елді жік-жікке бөле бастады. Біздің лейбористік үкімет ретіндегі міндетіміз – елді біріктіру, ал егер біз бұл мәселені шешпесек, ел әлдеқайда бөлшектенген болып қалады деп ойлаймын", – деді Шабана Махмуд журналистерге берген сұхбатында.
The Sunday Times деректеріне сәйкес, 2025 жылдың қаңтар–маусым айларында Ұлыбританияда 111 мың адам баспана сұраған. Қаңтардан наурыз айының соңына дейін осы процесс аясында 172 798 адамға тұруға рұқсат берілген.
