Халықаралық қылмыстық сот (ХҚС) сотқа дейінгі іс жүргізу шеңберінде Израиль премьер-министрі Беньямин Нетаньяху мен Қорғаныс министрі Йоав Галантты тұтқындауға санкциялар беру туралы шешім қабылдауды кейінге қалдырды, деп жазады Inbusiness.kz сайты.
ХҚС бұл қадамға Ұлыбритания осы мәселе бойынша Халықаралық қылмыстық әділет органының юрисдикциясына қарсы amicus curiae ("соттың досы") өтініш бергеннен кейін барғаны атап өтілді. Нәтижесінде, инстанция Лондонның сот процесіне араласу туралы өтінішін қанағаттандырып қана қоймай, басқа елдерге 12 шілдеге дейінгі мерзімде бұл іс бойынша өз ұстанымдарын білдіруге құқық берді. The Jerusalem Post жазғандай, ХҚС шешкеннен кейін тұтқындауға ордер берудің барлық процесі бірнеше айға созылуы мүмкін.
Кейбір елдердің сот жүйесі шеңберіндегі amicus curiae тәжірибесі сотқа іс жүргізуге тікелей қатыспайтын тәуелсіз сарапшылардың қоғамдық маңызы бар мәселелер бойынша өз қорытындыларын жіберуге мүмкіндік береді.
ХҚС прокуратурасы 2015 жылдың 16 қаңтарынан бастап Палестина аумағындағы жағдайды алдын-ала зерттеді. 2019 жылдың 20 желтоқсанында прокурор Фату Бенсуда Палестинаның өтініші бойынша прокурорлар алдын-ала зерттеуді аяқтады және бұл жағдай Рим статутының 2014 жылы Палестина территориясындағы Израильдің іс-әрекеттеріне қатысты толық тергеу ашу үшін барлық критерийлерін қанағаттандырады деген қорытындыға келді деп мәлімдеді.
2024 жылдың 20 мамырында прокурор Кәрім Хан Нетаньяху мен Галантты тұтқындауға санкция беруді талап етіп, алдын-ала өндіріс палатасына жүгінді. Оның айтуынша, прокурорлар Нетаньяху мен Галант "Палестина аумағында (Газа секторында) кем дегенде 2023 жылдың 8 қазанынан бастап жасалған әскери және адамзатқа қарсы қылмыстар үшін жауап береді" деген дәлелдер жинады.
