Ұлытау облысы жақында құрылғанына қарамастан, мақтануға тұрарлық себептер жоқ емес. Сондықтан, Республика күні қарсаңында өңірдің жетістіктері көрмесін ұйымдастыру туралы шешім қабылданды, деп хабарлайды inbusiness.kz сайтының тілшісі.
Іс-шара облыс орталығындағы Халықтар достығы мен мәдениеті үйінде өтті. Көрмеге облыстың үш қаласы мен екі ауданы өз өнімдерін ұсынды. Әр қайсысы туған өлкесінің экономика, өнеркәсіп, білім, спорт және өнер салаларында әйгілі және мақтан тұтатын жетістіктері мен жәдігерлерін көрсетуге тырысты.
Әкімдер жетістіктерін өңір басшысы Дастан Рыспековке таныстырды. Айта кету керек, көрмеде ауыл шаруашылығы өнімдері, тоқыма бұйымдары, құрылыс материалдары, өнер, қолданбалы шығармашылық және т.б. экспонаттар болды. Қаражал қаласының өкілдері облыс орталығына қазіргі уақытта салынып жатқан нысандардың макеттерін әкелді.
– Қалада кәсіпкерлік те белсенді дамып келеді. Мұның дәлелі әкімнің гранттарын қаржыландыру сомасы 14 миллионнан 25 миллионға дейін ұлғайтылды. Осының арқасында біздің жас кәсіпкерлер өз ісін, бизнесін ашып, оны кеңейте алды. Олардың кейбіреулері бүгін осы көрмеге қатысып, өз өнімдерін ұсынады, – деп атап өтті Қаражал қаласы әкімінің орынбасары Диана Оспанбекова.
Айта кетейік, Ұлытау облысында ауыл шаруашылығында да айтарлықтай өзгерістер бар. Фермерлер егіс алқаптары мен өндірілетін тауарлардың тізімін кеңейтіп қана қоймай, жаңа технологияларды игеруде.
