Түркияда қайырымдылық шарасы әлі жалғасып жатыр. Осы жолы Тахсин мен Гүлайша Данажылардың әрекетіне көпшілік сүйсінді. Чорумның Алажа ауданында тұратын олар қарапайым тіршілік кешіп жүрген жандар. Жолдасы шаруашылықпен айналысса, Гүлайша ханым үй шаруасындағы әйел. Екеуінің арманы - Умраға бару еді. Сол үшін де 20 жыл бойы тірнектеп ақша жинаған. Алайда бір сәті түспеген. Енді елдің басына келген қиын кезеңде осы қаражатты зілзаладан зардап шеккендерге аударуға шешім қабылдаған. Сөйтіп, Түрік Қызылай қорының Алажа бөлімінің басшысы Фатих Арсланға табыстады.
- "Еліміз бен халқымызға сабыр берсін. Қаза тапқандардың отбасына көңіл айтамын, тірі қалғандарға сабыр, ал жаралыларға шипа тілеймін. Қиын күндерде біз де халықтың жанынан табылғымыз келді. Сондықтан жиған ақшамызды көмек ретінде береміз деп шештік", - деді ерлі-зайыптылар.
