Үнді инвесторлары Түркістан облысында бірқатар жобаны жүзеге асырмақ, деп хабарлайды әкімнің баспасөз қызметі.
Алматы қаласында Түркістан облысы әкімінің орынбасары Мейіржан Мырзалиев Chaudhary Group (CG Global) трансұлттық компаниясының басқарма төрағасы Бинод Чаудхари жəне атқарушы директоры Варун Чаудхаримен кездесті. Сондай-ақ, басқосуға "KAZAKH INVEST" ҰК" АҚ өкілдері мен Қазақстанның Үнді еліндегі төтенше және өкілетті елшісі Болат Сарсенбаев қатысты.
Аймақтың мүмкіндіктерінен хабардар болған Chaudhary Group компаниясының өкілдері бірқатар жобаны жүзеге асыруға ниетті екендіктерін білдірді. Атап айтқанда, қонақтар "Қасқасу" тау-шаңғы курортын салып, соған лайық қонақ үйлер мен инфақұрылым жүйелерін тартпақ. Жобаны жүзеге асыру үшін Испания немесе Швейцариядан тәжірибелі мамандарды тартуды көздеп отыр. Сонымен қатар, Түркістан өңірінен қонақ үй алып, кеспе өнімдерінің өндірісін кеңейту және өңірде Food Park азық-түлік паркін құруды ақылдасты.
Сондай-ақ, жиын барысында Chaudhary Group өкілдері Түркістан облысына арнайы жұмыс сапарымен келетіндерін айтты. Іс сапар аясында олар Қазығұрт ауданының индустриалды аймағында болып, ондағы тез дайындалатын кеспе өндірісі бойынша зауыт құрылысының барысымен танысады.
Айта кетейік, зауыт 2019 жылдың 1 шілдесінде толық іске қосылады деп жоспарланған. Жобаның инвестициялық құны 15 млн АҚШ долларын құрайды. Өндірілген кеспе өнімдері Ресей, Өзбекстан жəне Қырғызстан сияқты көршілес елдерге экспорттау көзделуде.
