Үндістандық компания Шығыс Қазақстанда бірнеше нысанның құрылысын жүргізеді, деп хабарлайды egemen.kz.
ШҚО Күршім, Марқакөл өңірінің тұрғындарын көптен бері толғандырып жүрген өткел мәселесі жуық арада шешімін табуы мүмкін. Бұқтырма су қоймасының үстінен салынатын көпірдің құрылысына қатысуға үндістандық кәсіпкерлер мүдделі болып отыр. Бұл жөнінде облыс әкімі Даниал Ахметов пен "Shapoorji Pallonji Kazakhstan" компаниясының басшылығы арасында өткен кездесу барысында мәлім болды.
Үндістандық компанияның директоры Гоудхама Будхар Рамамуртидің айтуынша, олар мемлекет-жекеменшік әріптестігі аясында Шығыс Қазақстандағы бірнеше нысанның құрылыс жұмыстарын жүргізуге ынталы. Оның ішінде атап айтқанда, Өскемен қаласындағы Ертіс өзені арқылы өтетін (Виноградов көшесі мен Өскемен-Таврия тас жолын жалғайтын) көпір, облыс орталығындағы 300 орындық көп салалы аурухана мен Семей қаласындағы 200 орынға шақталған аурухананың және де жоғарыда айтылған Бұқтырма көпірінің құрылыстары да бар. Бұл мақсатқа Үндістанның "Exim Bank" атты қаржы ұйымының қаражаты жұмсалмақ.
"Жалпы, "Shapoorji Pallonji" (Шапурджи Паллонджи) компаниясының 150 жылдық тарихы бар және осы уақыт ішінде біздің компанияға қатысты бірде-бір дау-дамай болмаған. Бүгінге дейін біздің құрылысшылар әлемнің 60-тан астам еліндегі ауқымды жобаларды жүзеге асыруға қатысқан. Енді сіздердің мемлекеттеріңізбен, Шығыс Қазақстан облысымен әріптес болуға мүдделіміз", - дейді шетелдік алпауыт компанияның еліміздегі ресми өкілі Гоудхама Будхар Рамамурти.
Кездесу барысында ол аймақ басшысына Үндістан, Сауд Арабиясы, Біріккен Араб Әмірліктері, Шри-Ланка сияқты елдердегі сәтті жүзеге асырған жобаларымен таныстырды.
"Бүгінде кейбір жобаның техникалық-экономикалық негіздемесі мен жобалау-сметалық құжаттамасы әзір. Яғни құрылыс жүргізуге еш кедергі жоқ. Егер компанияларыңыз бұл жобаларға қатысуға шын мәнінде дайын болса, онда сіздерге өз тарапымыздан қолдан келген көмекті көрсететін боламыз", - деді өз кезегінде облыс әкімі Даниял Ахметов.
Келіссөз соңында облыс әкімдігі мен "Shapoorji Pallonji Kazakhstan" компаниясы арасында өзара ынтымақтастық туралы меморандумға қол қойылды.
