Елдің Қор банкі криптовалюта саудасына шектеу салған болатын. Үндістанның Жоғарғы соты тыйымның күшін жойды. Бұл туралы жергілікті ақпарат құралдары хабарлап жатыр.
Жоғарғы соттың мұндай қадамға баруына елдің криптовалютамен айналысатын бірнеше биржаның шағымдары түрткі болып отыр. Енді ЖІӨ көрсеткіші бойынша үшінші орындағы бұл дамушы елде криптовалюта заңды түрде қаржы құралы ретінде қолданылмақ.
Еске сала кетсек, 2018 жылдың сәуір айында Қор банкі елдегі барлық қаржы институттарына виртуалды валюталармен байланысы бар қызмет көрсетуге тосқауыл қойған еді.
Жергілікті басылымдардың дерегіне сүйенсек, Үндістан үкіметінің бір бөлігі әлі де виртуалды валюталарға қарсылығын білдіруде. Тіпті 2019 жылы криптовалютаға салынған тыйымды қатаңдатып, оларды қолданғандарға айыппұл салуды және 10 жылға бас бостандығынан айыруды ұсынған.
Табиғат Нұрболат
