"Бүгін бұл территория жаңа болашаққа қадам басқалы тұр", – деді ел премьер министрі Нарендра Моди.
Оның айтуынша, екі әкімшілік ауданды Джамму мен Кашмир штаттарының орнына құру Үндістанның тәуелсіздігі жолында күрескен қайраткер Валлабхаи Пательдің 144 жылдығына орайластырылып отыр.
Моди үкіметтің неліктен мұндай қадамға барғанын түсіндірді. Бұрын Джамму мен Кашмир штаттарына айрықша мәртебе беретін конституцияның 370-ші бабы сәтсіз болғанын жеткізді. Тіпті оның салдарынан аймақта сепаратизм мен лаңкестік белең ала бастаған. Премьер соңғы 30 жыл ішінде 40 мыңға жуық бейбіт тұрғынның лаңкестер қолынан қаза тапқанын айтты.
Естеріңізге сала кетейік, 5 тамызда ресми Нью-Дели конституцияның 370-ші бабының күшін жойып, Джамму мен Кашмир штаттарының әкімшілігін тарататынын жариялаған болатын. Ал олардың орнына Джамму мен Кашмир және Ладакх деп аталатын екі одақтас аймақ құру туралы шешім қабылдады. Үндістан билігінің бұл қадамын Пәкістан мен Қытай сынға алды. Осыдан кейін бұл аймақтағы ахуал одан сайын шиеленісіп түсті.
Табиғат Нұрболат
