Алматы төрінде өтетін XXVIII Бүкіләлемдік Универсиада ойындарының басталуына 20 күн қалды, деп хабарлайды "ҚазАқпарат" ХАА.
Еске сала кетейік, XXVIII Дүниежүзілік Универсиада 2017 жылдың 29 қаңтары мен 8 ақпаны аралығында Алматыда өтеді. Оның бағдарламасына мәнерлеп сырғанау, шорт-трек, тау шаңғысы, сноуборд, биатлон, шаңғымен жарысу, шайбалы хоккей (әйелдер мен ерлер арасында), керлинг, шаңғымен трамплиннен секіру, шаңғы қоссайысы, конькимен жүгіру спорты, фристайл секілді 12 спорт түрі енген. Жарыстарға 2 мыңға жуық спортшы қатысады деп күтілуде.
Универсиада өткізілетін уақытта 3 мың ерікті, оның ішінде көптеген шетелдік еріктілер атсалысады. Студенттер арасындағы спорт ойындарына 30 мыңға жуық отандық және шетелдік турист келеді деп күтілуде. Сайыстарды әлемнің 80 еліндегі 1 млрд адам теледидар арқылы тамашаламақ.
