Қазақстан Республикасы Ғылым және жоғары білім министрлігінің "Ғылым – қоғам игілігіне" айдары аясында химия ғылымдарының докторы, Қазақ ұлттық қыздар педагогикалық университетінің профессоры Мұхаметқали Матаевтың ғылыми қызметі таныстырылды, деп хабарлайды inbusiness.kz сайты.
Мұхаметқали Матаев жаңа функционалды материалдарды синтездеу, көпкомпонентті перовскиттердің қасиеттерін зерттеу және уран өндіру саласына арналған инновациялық технологияларды әзірлеумен айналысады. Оның ғылыми еңбектері іргелі ғылым мен өндірістік тәжірибені ұштастыруға бағытталған.
Ғалым мемлекеттік гранттық бағдарламалар аясында мультиферроиктер мен көпфункционалды магниттік материалдарды зерттеу, сондай-ақ уран өндіруді интенсивтендіруге арналған технологияларды әзірлеу бойынша бірнеше жобаны жүзеге асырған.
Қазіргі уақытта ол 2025–2027 жылдарға арналған ғылыми жоба аясында көпкомпонентті перовскиттердің қасиеттерін зерттеп жатыр. Бұл зерттеулер сенсорлық жүйелерде, электроника мен энергетика саласында қолданылатын жаңа материалдарды жасауға мүмкіндік береді.
Ғалымның авторлығымен уран өндіру тиімділігін арттыруға бағытталған бірнеше өнертабыс патенттелген. Мамандардың айтуынша, әзірленген технологиялар өндірісте қолданылып, ұңғымалардың өнімділігін 20–30 пайызға дейін арттыруға көмектескен.
Мұхаметқали Матаев – 100-ден астам ғылыми еңбектің авторы. Оның жетекшілігімен ғылым кандидаттары, PhD докторлары мен магистрлер даярланған.
