Үкімет отырысында индустрия және инфрақұрылымдық даму министрі Бейбіт Атамқұлов Қостанай, Жамбыл және Павлодар облыстарында ауыз сумен қамту деңгейі төмен екенін мәлімдеді.
Оның сөзінше, биыл қалалардың 97,5%, ауылдардың 87,7% орталықтандырылған су жеткізу көзделген. Бүгінгі таңда Солтүстік Қазақстан, Маңғыстау және Атырау облыстарындағы қала халқына ғана 100% орталықтандырылған сумен қамтылған.
"Алматы, Атырау және Қызылорда облыстарында ауылдық жерлерде сумен жабдықтау деңгейі төмен", – деді министр.
Бейбіт Атамқұловтың айтуынша, ауыз сумен қамту деңгейі Қостанай, Жамбыл және Павлодар облыстарында да көңіл көншітпейді.
"Нұрлы жер" бағдарламасы аясында ауылдарды сапалы және қажетті мөлшерде сумен жабдықтау қызметімен кезең-кезеңмен қамту жөнінде жоспар әзірленді. Сондықтан өңірлер халықты сумен қамтамасыз ету үшін осы жоспарды кейінге қалдырмай, тиімді шаралар қабылдауы керек", – деді Бейбіт Атамқұлов.
Қанат Махамбет
