Мамандар Муан әуежайында апатқа ұшыраған Jeju Air әуе кемесінің ұшқыштар кабинасында болған қара жәшігінің бірінен деректерді алды. Осылай деп Оңтүстік Корея азаматтық авиация департаментінің директоры Чжу Чжон Ван айтты, деп хабарлайды inbusiness.kz сайты жергілікті басылымға сілтеме жасап.
"Ұшқыштар кабинасында жазылған сөйлесудің деректерін алу аяқталды. Бүгін оларды дыбыстық файлдарға түрлендіру жұмыстары басталды", – деді Азаматтық авиация департаментінің директоры Чжу Чжон Ван.
Борттық өздігінен жазғышқа сақталған әңгімеде құстардың соқтығысуынан қозғалтқыштың зақымдалуы, ұшақты басқара алмау, сондай-ақ апатқа себеп болған шассидің істен шығуы туралы ақпарат болуы мүмкін деген болжам бар.
Екінші қара жәшіктің сыртына аздаған зақым келгені белгілі болды. Сарапшылар бұл оған жазылған деректердің сақталуына еш әсері болмайтынын анықтады.
