Бәсекелестікті қорғау және дамыту агенттігі кейбір заңнамалық актілерге бәсекелестік мәселелері бойынша өзгерістер мен толықтырулар енгізу туралы заң жобасына реттеуші саясаттың консультативтік құжатын әзірледі, деп жазады inbusiness.kz
Құжатта көрсетілгендей, бүгінде ұялы операторлар арасында клиент үшін бәсекелестіктің төмендеуі байқалады. Бұл ретте бағаның өсуіне, тұтынушыларға талап етілмеген қызметтерді жүктеуге, сондай-ақ байланыс және интернет қызметтерінің сапасына қатысты шағымдар көбейген.
Мәселен, өткен 2022 жылы ұялы байланыс операторларына қатысты байланыс қызметтерінің сапасы бойынша 1492 тексеру жүргізіліп, 3 млрд 44 млн теңге сомасына айыппұл салынды.
Сондай-ақ тұтынушылар тарапынан ұялы байланыс қызметтеріне тарифтердің өсуі туралы шағымдар бірнеше рет келіп түскен.
"Квазимемлекеттік сектор қатысатын нарықтарда баяндалған мән-жайлар мен баға белгілеудің ашықтығы кезінде осы саланы қоғамдық маңызы бар нарықтарға жатқызу жолымен ұялы байланыс қызметтеріне бағаларды мемлекеттік реттеуді енгізу ұсынылады", - делінген құжатта.
Құжатты жария талқылау мерзімі – 28 шілдеге дейін.
